காதல் துளிகள்

காதல் செய்தல் பாவம்
சொல்கிறது உலகம்....
எனவே,

உன்னையே வட்டமிட்டு என்னைக் கொன்று விடும் திட்டத்தோடிருக்கும்
என் எண்ணங்களிடமிருந்து தப்பிக்க
வானவில் ஏறி ஒளிந்து கொண்டேன் மேகங்களுக்குள்..
சற்றே நேரத்தில் நிலவின் ஒளியாய் வந்து
உன்னுள் என்னையோ
என்னுள் உன்னையோ
புதைத்து போனது உன் நினைவு
இது மேகத்தை மூடி விட்ட நிலா


உனக்கான நேசமே என் சுவாசமாகி விட்டதால்
மூச்சை இருக்கிக் கொண்டு
ஒளிந்து கொண்டேன் ஆழ்கடலின் அடியில்....
பெரியதாய் ஒரு ஞாபக அலை வந்து
விட்டுச் சென்றது என்னை
நீ இருக்கிற கரையினில் ....


வேண்டாத வேட்கை வேண்டாமென
வேற்றுகிரகத்தில் குடியேறினேன்
அங்கும் நட்சத்திரமாய் மின்னியது உன் நினைவு


உலகின் ஒவ்வொரு எல்லையிலும்
ஒளியாய்
காற்றாய்
உணர்வாய்
நீயிருந்தாய்!

முயற்சிகள் முற்றுப் பெற கூடாதென
வானிற்கு அப்பாலுக்கும் அப்பாலாய்
கடவுளுக்கருகில் நான் மட்டும் தனித்திருந்தேன்
அங்கோ
நானாய் நீ இருந்தாய்


எல்லாவற்றிலும் தோற்று
களைத்து நான் சாய்கையிலே..
இதமாய் எதோ ஒன்று உணர்ந்தேன்

உன் சுவாசத்திலே நான் இருந்தேன்
இதழோரம் புன்னகையோடு நின்றிருந்தாய் நீ
என் இதயத்தின் பக்கத்தில்......